مش هاطول عليكم في المقدمة ..
كانت اول مرة في حياتي اروح احتفال الشهيد العظيم مارجرجس امير الشهداء بديره بقرية ميت دمسيس . وهناك دعيت لاصلي قداس اثناء الاحتفال في شهر اغسطس . ورأيت ما رأيت . فحبيت ابعت لكل الشباب رسالة
حبايبنا شباب اليومين دول . . حاجة تفرح . مرتبطين جدا بأحتفالات القديسين ولما تسأله انت رايح فين ؟ يقولك : انا رايح المولد
وطبعا صاحبنا عامل حسابه كويس لانه ممكن يقضي كام ليله كده في " المولد " أو على الاقل يقضي " سهرة صباحي " أصله بيشجع السهر الروحي ..!
وطبعا حبايبنا شباب اليومين دول عندهم أهداف لازم يحققوها _ ولكن على طاولة النشان _ وما فيش مانع من قليل من البومب والصواريخ لزوم الصحصحة . بس اوعوا تفهموا غلط لان الصاروخ جه عند رجلين الشابه اياها بالصدفة البحتة !! وما اكثر الصدف في ليالي المولد ..
فبعد الصدفة يتم التصالح والتعارف وما المانع من قليل الشاي او الترمس ويرتبط الشباب في المولد بوشائج المحبة _ الروحية طبعا _
وحدث ولا حرج عن اساليب الترويح المختلفة في " المولد " بل قل اساليب الانحراف المختلفة .
وعلشان تعرفواقد ايه شبابنا بيحب يحتفل بالقديسين في " موالدهم " اسأل اي واحد فيهم : انت قضيت كام ساعة داخل الكنيسة في رحاب القديس ( القديسة ) _ ده إن دخل الكنيسة اصلا _ وكام ساعة في اللهو وأكل الحمص ؟
يا سلام لو حبايبنا شباب اليومين دول يعرفوا ان احتفالاتنا بالقديسين بتكون يوم الاستشهاد والانتصار مش يوم مولده _ زي اخوتنا التنيين _ وآه لو عرفوا أن اكرام القديسين مش تقديم النزور ونحر الذبائح ولا بالهيصة والزمبليطة .. بل إكرام القديس في ان تقتدي بيه وتعرف جمال سيرته ونقاوة مسلكه . وبطلب صلاته كي يعيننا على الجهاد ويصلي من اجلنا امام عرش النعمة لتغفر خطايانا .
آه لو شباب اليومين دول وهم رايحيين احتفالات القديسين يفتكروا الآية اللي بتقول :
لذلك نحن ايضا اذ لنا سحابة من الشهود مقدار هذه محيطة بنا لنطرح كل ثقل و الخطية المحيطة بنا بسهولة و لنحاضر بالصبر في الجهاد الموضوع امامنا عب 12: 1
موضوع: حبايبنا شباب اليومين دول (( الجزء الثالث: شباب المولد )) 
الجمعة أكتوبر 24, 2008 5:39 pm
