koky عضو مميز
عدد الرسائل : 8 العمر : 33 العمل/الترفيه : مش بعمل حاجه مفيده المزاج : ميه ميه تاريخ التسجيل : 19/10/2008
| موضوع: الف ليله و ليله (جامد طحن ادخل و انت تعرف) الأحد أكتوبر 19, 2008 12:15 pm | |
| النهاردة معانا الف ليلة وليلة 2008
الليلة الأولى
"الله *********......ايه يبنى انت وهو الدوشه اللى بره دى؟..........هو الواحد ميعرفش يرتاح في قصره شويه؟ ..........اندهولى الوزير " - دى الناس عامله مظاهره بره يا سعادة الباشا السلطان - ليه بأه ان شاء الله؟ - مش لاقيين عيش - طب قول للافران تخبز عيش - ماهو الفرانيين عاملين مظاهره هم كمان - ليه تانى؟ - مفيش دقيق - قول للمطاحن يطحنوا شوية قمح - نفس المشكله سعادتك مفيش قمح - يا عم ما تخلى الفلاحين تزرع ده انت فقرى اوى - ماهم بأه الفلاحين اللى عاملين مظاهره وسايبين الزرع عشان مش لاقيين عيش - ااااااااااااه طب اصرفلهم عيش من المخازن - ماهى فاضيه سعادتك من ساعة المظاهره الاولى - خلاص اصرف لكل واحد كارت شحن من ابو خمسه وعشـ...ولا خليه من ابو عشره - امرك يا سعادة الباشا السلطان - تعالى هنا صحيح ............ جبتلى عروسه النهارده ولا ايه النظام؟ - هنشوف يا باشا - طب استنضف بأه مش زى ليلة امبارح - ماهو مفيش بنات يا باشا فى البلد.....الناس كلها بعتت بناتها للبلاد التانيه - طب انت مش عندك بنت؟ - اه شهرزاد يا باشا - طب هتجوزها.......روح يلا مالك متسمر كده ليه؟
"وفى قصر الوزير" - يا بنتى اسمعى كلامى يلا ناخد اول طياره على بره - لا يا بابا سيبنى احاول معاه - يا بنتى انا شايل قرشين حلوين فى سويسرا هيعيشونا ملوك - قلت لا ....لو عاوز تخلع انت اخلع لوحدك - منا عامل كده عشانك انتى - طب وعشانى انا اقعد وشوف انا هعمل ايه - اما نشوف
(وتم الزفاف سريعا وفى اوضة النوم الملكيه....) - انتى مالك فرحانه كده ليه؟ ده انتى هتموتى الصبح - منا عارفه - عارفه ومبسوطه كمان؟ - اه - هو الوزير مخلف عيله هابله ولا ايه بس - يا عم ما كلنا هنموت - اه بس انتى بكره - وانت امتى يعنى يا فتك؟ - الله اعلم - مانت ممكن تموت قبلى - بقولك ايه انا مصهلل النهارده ومش طالبه معايا نكد .....حد يقول لسلطان فى فرحه انت هتموت قبلى؟ - يعنى حد يقول لعروسه فى ليلة فرحها هتموتى بكره انت كمان؟ - عندك حق انا هنام بأه - نعم يخويا؟ انت متجوزنى عشان تنام وتموتنى؟
- خلاص خدى الريموت عندك فيه فيلم اجنبى حلو فى الـ
MBC2 والاوربت فيها فيلم عربى جميل برده
- لا يا عم مش عاوزه تليفزيون - امال عاوزه ايه بأه......احكيلك حدوته؟ - لا احكيلك انا يا شوشو - طب احكى يا ستى وصدعينى - ولو عجبتك تسيبنى متموتنيش بكره؟ - لو معجبتنيش هموتك دلوقتى ولو عجبتنى هسيبك للصبح - طب اسمع الاول وبعدين ابقى بق - قولى يختى - بص يا عم بيقولك مره واحد ....... - انتى هتحكى حدوته ولا نكته؟ - اهمد باه انت مش ليك حدوته؟ اسمع للاخر بأه - ماشى قول يا عم على بابا...........اوعى تكون بتاعة على بابا؟ - لا دى قصة واحد فقرى - اه كده لايقه عليكى قولى ما هى ليله باينه فقريه من اولها - بص يا سيدى وما ستك الا انا - خدى راحتك مانتى كده كده ميته بكره - يا عم متفولش اياكش انت تسبق ......بص يا عم بيقولك مره واحد فقرى اوى كان ماشى الصبح ورايح يجيب فطار لاولاده حلو الكلام؟ - (بملل ) كملى كملى - فهو بيعدى جسر كده وبيبقى معاه سلطانيه بيجيب فيها الفول بتاع الفطار المهم وقع من على الجسر ده فى قلب الميه....وقع فين؟ - اخلصى يا حجه بأه هو انتى بتحكى لعيل صغير؟ - ماشى يا عم العجوز.....المهم نزل تحت الميه ناس اخدوه تحت اوى كمان لقى بلد كامله ... - (باهتمام بس مش عاوز يبين) كل ده تحت الميه؟ - اه واخدوه على الملك بتاعهم كمان اواااااااااااااااااااااااه (بتتاوب) - كملى بسرعه بأه - لا يا عم انا عاوزه انام - يا بت كملى باه متزهقينيش - ازهق - هتخلينى اتعفرت - على نفسك - يا مسرور - امرك يا باشا السلطان - طير رقبتها - يلا يا مسرور طير وخلصنى وابقى كمله انت الحدوته بأه - استنى يبنى انت ما صدقت يله .......روح انت دلوقتى - امرك يا سعادة الباشا السلطان - طب ماشى مجتش من يوم انا ممكن اجيب اى حد يحكيهالى بس يلا هسيبك وبكره تخلصى الحدوته واطير رقبتك .... يتبع | |
|
Admin Admin
عدد الرسائل : 391 العمر : 33 العمل/الترفيه : programmer المزاج : very good تاريخ التسجيل : 18/10/2008
| موضوع: رد: الف ليله و ليله (جامد طحن ادخل و انت تعرف) الأحد أكتوبر 19, 2008 1:21 pm | |
| ميرسى ليكى يا حيبييكوووووو على الحاجات الجامدة دى ربنا يباركك | |
|
sshhaaggyy ادارة المنتدى
عدد الرسائل : 364 العمر : 35 العمل/الترفيه : الموسيقي المزاج : مبسوط تاريخ التسجيل : 18/10/2008
| موضوع: رد: الف ليله و ليله (جامد طحن ادخل و انت تعرف) الأحد أكتوبر 19, 2008 4:32 pm | |
| ميرسي يا قمر علي الموضوع الجميل دة ههههههههههه ربنا يباركك | |
|
ramez mimi عضو مميز
عدد الرسائل : 32 العمر : 31 العمل/الترفيه : رسم ومسيقى المزاج : عاشق تاريخ التسجيل : 19/10/2008
| موضوع: رد: الف ليله و ليله (جامد طحن ادخل و انت تعرف) الجمعة أكتوبر 24, 2008 4:01 pm | |
| بجد مرسيى على الموضوع الجامد موت ربنا يباركك على تعبك دة | |
|
???? زائر
| موضوع: رد: الف ليله و ليله (جامد طحن ادخل و انت تعرف) الأربعاء أكتوبر 29, 2008 1:25 pm | |
| |
|
كيرلس نادى عضو ماسى
عدد الرسائل : 62 العمر : 29 العمل/الترفيه : نكت المزاج : مبسوط تاريخ التسجيل : 22/10/2008
| موضوع: الف ليله و ليله (جامد طحن ادخل و انت تعرف) الخميس أكتوبر 30, 2008 7:46 am | |
| | |
|